អ្នកចាំទីក្លឹបកាំភ្លើងធំ ជឿជាក់ថា Arsenal នឹងឈ្នះពានរង្វាន់ Premier League នៅរដូវកាលនេះ
25-December-2015 | ដោយ មួយឡា
ថ្មីៗនេះ អ្នកចាំទី Petr Cech របស់ក្លឹប Arsenal បាននិយាយថា កីឡាករជាច្រើននាក់របស់ក្លឹបនេះចាប់ផ្តើមលេងបានយ៉ាងល្អ ហើយពួកគេមើលឃើញថាពួកគេនឹងឈ្នះពានរង្វាន់ Premier League នៅរដូវកាលនេះ។ ជោគជ័យធំមួយរបស់ក្លឹប Arsenal គឺបានយកឈ្នះក្លឹប Manchester City នៅក្នុងលទ្ធផល 2-1 នៅទឹកដី Emirates កាលពីយប់ថ្ងៃច័ន្ទ ហើយពួកគេទើបតែចាញ់ 1 ប្រកួតប៉ុណ្ណោះក្នុងប្រកួត 11 ប្រកួតចុងក្រោយរបស់ពួកគេ។
កីឡាករ របស់លោក Arsene Wenger បានលេងបានយ៉ាងល្អទោះបីជាកីឡាករសំខាន់ៗជាច្រើននាក់របស់ក្លឹប Arsenal បានរងរបួសដូចជា Jack Wilshere, Mikel Arteta, Santi Cazorla, Danny Welbeck, Tomas Rosicky និង Francis Coquelin ។ អ្នកចាំទី Cech មានជំនឿថា បើទោះបីជាកីឡាកររបស់ក្លឹប Arsenal រងរបួសច្រើននាក់ក្តី ប៉ុន្តែក្តីសង្ឃឹមក្នុងការលើកពានរង្វាន់ Premier League គឺជាឆន្ទៈដែលធ្វើឱ្យក្លឹប Arsenal ប្រឹងប្រែងយ៉ាងខ្លាំង។
Cech បានប្រាប់សារពត៌មាន BBC Sport ថា “ខ្សែប្រយុទ្ធរបស់យើងពិតជាខ្លាំងណាស់ ហើយគ្រូបង្វឹកអាចរើសកីឡាករណាមួយមកលេងបានល្អគ្រប់គ្នា។ យុទ្ធសាស្ត្ររបស់គ្រូបង្វឹកពិតជាដូចអ្វីដែលគាត់ចង់បាន។ យើងដឹងថានៅរដូវកាលនេះ កីឡាកររបស់យើងជួបបញ្ហារបួសជាច្រើននាក់។ បើទោះបីជាអ្វីគ្រប់យ៉ាងមិនទៅរលូនដូចអ្វីដែលយើងគិត ប៉ុន្តែយើងមិនអាចគេចពីការមិនរងរបួសនោះទេ។”
“ពេលខ្លះគ្រាន់តែកីឡាកររងរបួសតិច ឬច្រើននាក់ប៉ុណ្ណោះ។ តែ Arsenal បានបង្ហាញគ្រប់គ្នាថា បើទោះបីជាកីឡាកររបស់យើងរងរបួសក្តី ក៏យើងនៅតែអាចយកឈ្នះការប្រកួតជាច្រើនជាប់ៗគ្នាផងដែរ។ ខ្ញុំជឿជាក់ថា នៅពេលដែលកីឡាកររបស់យើងត្រលប់មកវិញនោះ យើងគឺកាន់តែខ្លាំងជាងនេះទៀត។ ប្រសិនបើចំណាត់ថ្នាក់របស់យើងនៅតែល្អបែបនេះរហូតដល់ខែមីនា ឬមេសា យើងប្រាកដជាក្លាយជាម្ចាស់ជើងឯក Premier League ជាក់ជាមិនខាន៕”
ប្រភព៖ goal , sportkh
ចំនួនអ្នកទស្សនា
- ថ្ងៃនេះ121
- ម្សិលមិញ3791
- សប្តាហ៍នេះ121
- ខែនេះ68871
- ឆ្នាំនេះ405131
- សរុប19632577